Багаты ўраджай дыпломаў сабралі Касцюковіцкія ўдзельнікі IV рэгіянальнага свята-конкурса “Спас – усяму час”, якое праходзіла ў рамках фестываля “Макавей” на знакамітай Слаўгарадскай крыніцы.
Канкурсанты змагаліся за перамогу ў чатырох намінацыях. І ў кожнай з іх Касцюковіцкія выканаўцы ўзялі дыпломы. У намінацыі “Лепшы фальклорны калектыў” дыплом трэццяй ступені атрымалі ўдзельніцы народнай сямейна-родаснай групы “Радня” Муравільскага сельскага Дома культуры. Дзяўчыны-прыгажуні ўразілі гледачоў сваім непаўторным трохгалоссем.
У намінацыі “Лепшы саліст-фалькларыст” дыпломам першай ступені ўзнагароджана Алеся Шаройка Новасаматэвіцкага клуба вольнага часу, якая выйшла на сцэну ў рэстаўраванай святочнай вопратке сваёй бабулі і праспявала яе любімыя песні.
Гучна і прыгожа прагучаў народны ансамбль “Сяброўкі” Сялецкаўскага сельскага Дома культуры. Калектыў атрымаў дыплом трэццяй ступені ў намінацыі “Лепшы вакальны калектыў народнай песні”.
У намінацыі “Лепшы індывідуальны выканаўца народнай песні” перамогу атрымала самая маленькая канкурсантка Вікторыя Фралянкова, удзельніца мастацкай самадзейнасці Муравільскага сельскага Дома культуры. Сваім запалам і галасістасцю Вікторыя пакарыла ўсіх прысутных. Гледачы і журы не шкадавалі далоняў!
Падзяку за працу і мастацкае ўпрыгожванне свята майстрам дэкаратыўна-прыкладнога мастацтва таксама выказалі дыпломамі “За актыўны ўдзел у свяце-конкурсе “Спас – усяму час”.
Наталля ДРОБЫШАВА,
намеснік дырэктара
цэнтралізаванай клубнай сістэмы
Касцюковіцкага раёна.