У Касцюковічах прайшла сустрэча з прадстаўнікамі культуры і органамі выканаўчай улады ў рамках падрыхтоўкі і правядзення Дня беларускага пісьменства.
Ганаровымі гасцямі мерапрыемства сталі кіраўніцтва раёна, старшыня ГА «Саюз пісьменнікаў Беларусі» Аляксандр Карлюкевіч, начальнік галоўнага ўпраўлення ідэалагічнай работы і па справах моладзі Магілёўскага аблвыканкама Кацярына Музычэнка, старшыня Магілёўскага абласнога аддзялення Саюза пісьменнікаў Беларусі Вольга Бялова.
У рамках акцыі «Пісьменнікі краіны — Касцюковічам» Аляксандр Карлюкевіч перадаў цэнтральнай раённай бібліятэцы імя І.Чыгрынава 938 выданняў беларускіх аўтараў, якія пабачылі свет ў апошнія тры гады. Сярод іх – кнігі, прысвечаныя Вялікай Айчыннай вайне, зборнікі прозы і паэзіі, творы для юных чытачоў, навукова-пазнавальныя выданні беларускіх аўтараў.
– Гэта культурная акцыя, прымеркаваная да Дня беларускага пісьменства, які ў хуткім часе напоўніць наш горад святочным настроем, стане яскравай і памятнай падзеяй для кожнага з нас, – адзначыла кіраўнік раёна Наталля Асмалоўская.
– Бібліятэка – гэта галоўны цэнтр любой літаратурнай падзеі, – падкрэсліла Кацярына Музычэнка. – Яна захоўвае кнігі, збірае людзей разам і дарыць жывую камунікацыю з культурай. Без яе свята слова губляе свой глыбокі сэнс і душу. Бібліятэка дапамаге чытачам адкрываць новыя імёны і жанры. Таму напярэдадні Дня беларускага пісьменства правільна будзе назваць бібліятэку сэрцам Касцюковіцкага раёна і свята айчыннага слова.
Да ўдзельнікаў мерапрыемства звярнуўся Аляксандр Карлюкевіч:
– Мне вельмі прыемна прысутнічаць на зямлі, якая падарыла Беларусі дваіх народных пісьменнікаў – Аркадзя Куляшова і Івана Чыгрынава.
Дзень беларускай пісьменнасці стане 33-м літаратурным форумам у гісторыі нашай краіны. Асноўнымі тэмамі будуць Год беларускай жанчыны, 85-я гадавіна пачатку Вялікай Айчыннай вайны, пяцігодка якасці і юбілеі класікаў беларускай літаратуры. Асноўныя гістарычныя эпізоды развіцця кнігадрукавання на Магілёўшчыне адлюструюць у інтэрактыўным фармаце выставы. Упершыню адкрыюць павільён рэдкай кнігі з факсіміле і старадрукаванымі выданнямі.
Як зазначыў Аляксандр Мікалаевіч, варты ўшанавання і тыя, хто пайшоў з жыцця, пакінуўшы багатую літаратурную спадчыну. Неацэнны ўклад у літаратурнае жыццё Касцюкоўшчыны ўнёс былы старшыня Магілёўскага абласнога аддзялення Саюза пісьменнікаў Беларусі Алесь Казека, дзякуючы якому былі адкрытыя новыя імёны Прыдняпроўскага краю.
Кожная кніга, падараваная сёння, зойме годнае месца на бібліятэчных паліцах і будзе радаваць многіх чытачоў.
Фота Алесі ШАРОЙКА
