19 і 20 красавіка 2019 года ў Касцюковіцкім раёне адбылася творчая прэзентацыя аматарскіх калектываў “Таленты Касцюкоўшчыны”.
Калі мы рыхтаваліся да мерапрыемстваў, увесь час дакучала адно пытанне – адкуль усё ж такі, крыніцы творчасці, чаму наша старонка багатая на таленты. І, калі паглыбіцца ў далекае мінулае, стане зразумела, што толькі ад любові да малой радзімы, да родных краявідаў, ад бяздонных крыніц і рэк, ад спеўнага шуму лясоў і шчырай народнай песні, якая заўсёды гучала сярод людзей, бярэ свае вытокі творчы пачатак Касцюкоўшчына. 
19 красавіка 2019 года ў раённым Цэнтры культуры адбыўся канцэрт-прэзентацыя творчых калектываў з найменнем “народны”, “ўзорны”. У нашым раёне дзейнічае 25 такіх калектываў. Гэта сваеасаблівыя, яркія ансамблі, асобныя выканаўцы, майстры, рамеснікі. І такая вось яркая палітра талентаў нам засталася ў спадчыну ад папярэдніх пакаленняў і, па сённяшні дзень, яны працуюць на дастаткова высокім мастацкім узроўні, які неаднаразова атрымліваў высокую ацэнку на фестывалях, форумах, смотрах-конкурсах у гледачоў і арганізатараў мерапрыемстваў. 
Прэзентацыя пачалася з вуліцы ў форме кірмашу “Запрашаем на кірмаш”. На тэматычных пляцоўках размясціліся: кірмаш-абрад “Гусінае свята” (народны вакальны ансамбль “Белая Дуброва” Беладубраўскага СДК), свята “Ільінскі кірмаш”, на якім майстры-рамеснікі праводзілі майстар-класы разьбы па дрэве, лозапляценню, карункапляценню, роспісу па дрэве, кераміцы (удзельнікі народнага клуба майтроў і рамеснікаў “Спадчына” РДР); гучалі народныя і фальклорныя песні ў выкананні народнага ансамбля народнай песні “Сяброўкі” Сялецкаўскага сельскага Дома культуры, танчылі бытавыя танцы. На пляцоўцы дзіцячай школы выяўленчага мастацтва “Вобразы роднага краю” адбыліся інтарактыўныя маляванні на мальберце, дзе навучэнцы школы паказалі свае здольнасці ў стварэнні карцін (узорная студыя выяўленчага мастацтва “Галінка” ДШВМ).
На працягу дня ў файе гучала музыка ў выкананні ўзорнага духавога аркестра “Новае пакаленне” (кіраўнік Іваноў Мікалай Сяргеевіч), а перад пачаткам канцэрта ўсіх вітаў народны інструментальны ансамбль “Касцюковіцкія музыкі”. Гучанне народнай музыкі ў гледачоў вызвала непадманную цікавасць і да самага пачатку канцэрта людзі слухалі і здымалі “Касцюковіцкіх музыкаў” на тэлефоны.
Мясцовая майстрыца Валянціна Волкава для ўсіх жадаючых правяла майстар-клас па ткацтве беларускіх традыцыйных паясоў, а на сцяне красавалася выстава з карцін, выкананых у тэхніцы баціка. А яшчэ, ўсіх гасцей свята віталі казачныя лялькі майстрыцы Савінец Тамары Васільеўны: Гаспадыня Меднай гары, Усходняя прыгажуня, Беларуская гаспадыня і шмат іншых. 
Затым на сцэне загучалі песні, танцы і музыка ў выкананні наступных калектываў з найменнем: духавы аркестр РЦК і эстрадны духавыя аркестр “Каскад BAND”, ВІА “Этыкет”, ансамбль народнай песні “Калініца”, эстрадная студыя “Шанс”, вакальны ансамбль “Альянс”, хор работнікаў культуры, вакальны ансамбль работнікаў ЖКХ “Бліскавіца”, вакальны ансамбль медыцынскіх работнікаў “Надзея”, дзіцячая эстрадная студыя “Д.Т.П.”, харэаграфічны калектыў “Мазаіка”, хор ветэранаў працы, сямейна-родасны гутр “Радня”. 
Ад нумара да нумара канцэртнай праграмы “Табе пяю, мой край любімы!” ў гледачоў не знікала цікавасць да выканаўцаў, бо калектывы паказвалі самае лепшае, што за шмат гадоў творчай дзейнасці было напрацавана. Пелі і танчылі сумленна і ад душы, таму кожны чалавек пакідаў залу ў сапраўдным захапленні ад убачанага і пачутага. 
На другі дзень творчага марафону, 20 красавіка, мы накіраваліся ў аграгарадок Муравілле, дзе жыве і працуе ў Доме культуры таленавітая сям’я Кірыенка-Шаханавых, стваральнікаў вядомых у нашым раёне, і не толькі, такіх калектываў, як сямейна-родасны гурт “Радня” і дзіцячы ансамбль народнай песні “Муравушка”. 
Спецыялісты раённага Дома культуры арганізавалі вечарыну, прысвечаную творчай дзейнасці калектыву “Радня”. Радня — гэта дзве сястры, якія калісьці па закліку душы прыйшлі працаваць у сферу культуры і працягнулі традыцыі сваіх бацькоў, якія з самага дзяцінства прыладзілі іх да народнай творчасці. Наталля ўспамінала: “Настаўнікамі на той момант былі мой тата – Кірыенка Карп Уладзіміравіч і мая маці – Кірыенка Людміла Іларыёнаўна. Яны заўсёды былі рады таму, што кожны вечар наша хата поўнілася моладдзю і ў ёй гучалі песні, развучвалі інсцэніроўкі, чыталі вершы. Разам з дзяўчатамі мы пашылі сабе адзенне, ўпрыгожылі яго, сплялі вяночкі з каляровай паперы. Гэта і былі нашы канцэртныя касцюмы. Калі мы, ў выніку штоднёвых рэпетыцый, набылі дастатковы рэпертуар, то сталі ладзіць канцэрты не толькі для сваіх жыхароў, але і наведвалі суседнія вёскі…”. 
Першыя гады прафесійнай дзейнасці калектыў аддаваў перавагу, ўсе такі народнай песне. Народная песня – гэта першародны выток народнай творчасці. Ён ніколі не персохне, пакуль есць сувязь пакаленняў, і есць людзі, якія чэрпаюць натхненне ў ім. Самае цікавае, дзяўчаты да гэтага часу не страцілі сувязі са старэйшым пакаленнем і, напярэдні мерапрыемтва, завіталі ў госці да носьбіту аутэнтыкі Аліпчанка Таццяны Аляксандраўны разам з загадчыцай аўтаклуба Марынай Тарасавай. Таццяна аАляксандраўна з задавальненнем пагутарыла з гасцямі і праспявала такія знаёмыя, такія блізкія песні, якія ведаюцьт толькі гэтыя нешматлікія сведкі-носьбіты. 
Напачку прафесійнага шляху ў калектыве спявалі ўсе: і брат Уладзімір з сынам, і дочкі Таццяна і Ліза. Затым з цягам часу, засталіся толькі дзяўчаты Наталля, Алена і Ліза, і ў траіх яны зараз працуюць у доме культуры. Дзяўчаты расказалі, як яны ў творчых пошуках стваралі першыя калектывы, якія яны былі, як яны змяняліся з чагам часу. Самым ўдалым праектам за ўсе гады дзейнасці стаў дзіцячы калектыў “Муравушка”, які працуе і па сённяшні дзень. Зараз кіраўніком калектыву з’яўляецца Лізавета (дачка Алены), якая вырасла праз гэты калектыў і з цягам часу зрабіла яго больш сучасным, але народная песня засталася асноўнай і нязменнай каштоўнасцю. 
Іх талент я заўсёды лічыла нейкім дарункам звыш: своеасаблівая манера выканання песен, гумар з густам, глыбіня і чысціня слова, адказнасць за тое, што яны дорасць са сцэны людзям. На вечарыне мы прыгадалі самыя яркія моманты прафесійнай дзейнасці, а іх было шмат: яркія і запамінальныя калектывы, актуальныя творы, тэмы, вобразы, ўдзел у розных творчых конкурсах, нават, у творчым тэлепраекце “Песні маёй краіны”. Цешыць тое, што здабыткі таленту не ідзуць ў нябыт, а жывуць ў рэпертуары іншых калектываў. Радню віншавалі і народны хор ветэранаў працы аўтарскай песняй Наталлі “Два галубы”, і народны ансамбль народнай песні “Калініца”, так сама аўтарскай песняй “Сонейка”. 
Народны вакальны ансамбль “Весялуха” Тупічынскага сельскага Дома культуры, акрамя песен, выканалі дзве гумарэскі “Першаклашкі” і “Мазоль”, а Алеся Хрыпачова прачытала байку “Вясковая панарама”:
А ні ў адзінай панараме
Няма навін, як у вясковай краме.
Ледзь дзверы адчыняе крама —
І паняслася панарама.
Сядзяць тут Фёклы, Домны, Ганны,
Сядзяць дзяўчыны быццам панны.
На абгаворы дужа ж яны шпаркі,
Яднае іх усіх “сіндром пляткаркі”.
У бедалаг аж вусны смягнуць,
Так найсвяжэйшых плётак прагнуць…
Па гледачах было бачна, што ўсё сказанае і убачанае дайшло да самага сэрца, ў зале панаваў шчыры і сардэчны настрой, усе ўдзельнічалі ў размове, смяяліся і пелі. 
У канцы вечарыны, літаратурны гур “Акрыленне” раённага Цэнтра культуры выканаў невялікую п’есу “Паветра маёй Радзімы”, якую Наталля напісала па ўспамінах з дзяцінства, пра той час, калі здарылася Чарнобыльская трагедыя. 
Увогуле, рыхтаваўшыся болей месяца да творчай прэзентацыі атрымалася так – сябе паказалі, пра таленвітых людзей пагаварылі і адпачылі душой! Дзякуй усім, хто прымаў у гэтым удзел! 
Святлана Захарэнка,
намеснік дырэктара цэнтралізаванай
клубнай сістэмы Касцюковіцкага раёна
