З надыходам вясны «Ліпавы ручай» зноў сабраў гасцей і загучаў традыцыямі, якія аб’ядноўваюць пакаленні і дораць радасць.
Як заўсёды святкаванне пачалося з прыгатавання пачастункаў. На вогнішчы варылася вуха, пах якой казытаў нос, а яечня з салам уздымала настрой усім прысутным. Гарачы чай з самавара і печаныя гаспадынькамі булачкі-птушачкі стваралі атмасферу свята і ўтульнасці. Сонца свяціла ярка, запрашаючы ўсіх атрымаць асалоду ад гэтага цудоўнага дня, і дарыла вясновую радасць кожнаму сэрцу.
Адным з самых яркіх момантаў свята стала чароўнае ўпрыгожванне бярозкі, якую, прыбралі ў рознакаляровыя стужкі. Гэтае сімвалічнае абрадавае дзейства ўвасабляе сабой абуджэнне прыроды і радасны надыход вясны, калі ўсё вакол напаўняецца жыццём і колерам.
Па добрай традыцыі птушачак з цеста спачатку падкідвалі на хустачцы высока ў неба, запрашаючы вярнуцца з далёкіх падарожжаў, а затым з пяшчотай і клопатам развешвалі іх на бярозцы, ствараючы на галінках жывапісную карціну.
Асаблівую ўвагу прыцягнула да сябе стараста вёскі Наталля Лабынцава, якая нагадала аб традыцыі ўмывацца талай вадой са снегу ў гэты дзень. Яна правяла абрад, і кожны жадаючы памыўся, адчуваючы на сабе свежасць і сілу прыроды.
Зялёная елачка, упрыгожаная кветкамі, – сімвал надзеі на шчаслівую будучыню, стала цэнтрам прыцягнення для ўсіх удзельнікаў свята. У старажытнасці гэты абрад праводзілі з мэтай прыцягнуць каханне і стварыць моцную сям’ю. Маладыя пары, прыбіраючы елку, верылі, што гэта дапаможа ім выйсці замуж ці ажаніцца, а таксама падаруе шчасце і дзяцей. Гэты абрад, які даўней праводзілі ў вёсцы, быў адроджаны. Жыхары вырашылі аднавіць традыцыю, каб зноў адчуць сувязь з продкамі і прыродай.
Артысты Новасаматэвіцкага клуба парадавалі гледачоў яркімі выступленнямі і арганізавалі сапраўдны канцэрт з выкананнем шчырых калектыўных песень.
Кожны з удзельнікаў свята забраў з сабой часцінку радасці, а таксама жаданне захоўваць традыцыі, якія робяць наша жыццё больш яскравым і насычаным.
Фота аўтара
